بصراحه مابي انسب القصيده لغير شاعرها لاني ماني متاكد مين قائلها بس جميله جدا وحبيت انكم تتطلعون عليها وتنال اعجابكم ويقول فيها:
عهدي بها قدّام تلبس عبايه
.........................وأنا بعد قبل البس شماغ وعقال
طفلين نتهجّى حروف البدايه
........................الله ياماأجمل سواليف الاطفال
كانت لنا في كل شارع حكايه
......................وكنّا نقول علوم ماهيب تنقال!
وكنت اتقاسم مامعاها معايه
........................من(عسكريم) التوت,للعلك ابوريال
وكانت بعكسي شاطره في القرايه
........................,تقرأ جزء عمّ وطه والانفال
وأنا لك الله من مواري غبايه
.......................مدري ابو نقطه هو الذال او دال
وكانت لابويه تشتكي من شقايه
.......................وتعلّمه كيف اربط الباب بحبال
ياما على ظهري كسر من عصايه
......................يقول لي:خلّك وأنا ابوك رجّال
وامي تقول:ادع لولدك الهدايه
.......................خوفي تصيبه كثرة الضرب بهبال
لاشفتها مع اول الدرب جايه
.......................مدري أنا اللي ملت ولاّ الوطا مال!
احسّ قلبي يرتجف في حشايه
.......................ماكنّه الاّ الضيف لاهزّ فنجال
ياما عن"السّعلي" تخبّت ورايه
......................لاخوفوها فيه ثم شافت ظلال
تقول:خلّك ياحمــــــــد معايه
........................واستانس العب عندها دور الابطال
وآغار حتّى من عيون اصدقايه
........................لاطالعوها قلت:تكفون ياعيال!