:1eye:البـــــــارحة جاني مـن الحـب مرسـال
من عقب ما بينـي وبينـه خصيمــــــــة


وانا ترى في الحــــــــــب مانيـب فعّـال
ولا بعـد ولّـع بقلبـي هشيـمـــــــــــــه


ولا بعد غنّيت فـي ساعـة وصــــــــــال
ولا بعد ذقـت الفــــــــــــــراق وجحيمـه


ولا جرى دمعــــــــــي على الخـد همّـال
ولابعـد جربـت مـــــــــــــــــــــرّ الهزيـمـة


حتى وردنـي تالـــــــــــــــي الليـل جـوال
وانـــــــــــا على شاهي وبسكـوت ديمـة


الرقم بايــــــــــــــــــخ لكـن الصـوت قتـال
كنه مثل صـوت المذيعـة حليمــــــــــــــة


قالت مساء الخـــــــــــــير يـا طيّـب الفـال
قلـت ارحبــــــــــــــي ترحيبـةٍ مستديمـة


بالعـــــــــــــــود والصفـري ودلـة وفنجـال
واجبك يا بنت الأصــــــــــــــــول الكريمـة


ردت بضحـــــــــــكة ثم قالت وش الحـال؟
قلت اشهد إن الحال عقبك سقيمـــــــــة


قالت وهي تضـــــــــحك بعد مثل الأطفال
وانـا بعـد كنـي بدونـك يتيمــــــــــــــــــة


من يـوم قالتهـا تزلزلــــــــــــــــــت زلـزال
من فجعتي كنـي مسـوي جريمــــــــــــة


قلت ارفعــــــــــي صوتك ترى مابه ارسال
كــــــــــــــــــذاب لكـنّ المصيبـة عظيمـة


قالــــــــــت أقول اسمع ترى هرجنـا طـال
ممكـن تصاحبنـي ترانـي وسيمـــــــــــــة


واسمي الحقيقي أول حروفـه الــــــــــدال
لكـن يسمّونـي البنـات الزعيمـــــــــــــــة


صحيح أحب الفخفخة واعشــــــــق المال
لكـن ترانـي طاهـرة مستقيــــــــــــــمـة


ما عندي امغــــــــــــازل ولا (لعب يهّـال)
ما عندي إلا في الشــــــــرف والحشيمـة


بس الصـــــــــــراحة قلبي لشوفتـك مـال
واصبحت وحــــــــــدك جالسٍ في صميمه


فـــــــــــــــــكّر بعقلك واترك القيـل والقـال
واحــــــــــــــذر تطيع اهل العقـول العقيمـة


وارســـــــــــل علي الحين خمسميـة ريـال
أشــــــــــــــــحن بهـا جـوال أختـي غنيمـة


أو طقم غــــــــــــــالي فيه خاتـم وسلسـال
أروح بـه فـي عــــــــــــــــــــرس ولاّ عزيمـة


قلـــــــــــــــت الحقيقة مانيب رجـل أعمـال
ولانـــــــــــــــــــي بتاجـر والمـوارد عديـمـة


أنا الصــــــــــــــــــراحة شبـه عطّـال بطّـال
وعلاقتـي بالفقـر جـــــــــــــــــــداً حميـمـة


والراتب الله يرحــــــــــــــــــم الحـال مـا زال
محــــــــــــــــدود والمصـروف ربـي عليمـه


والديـــــــــــــــــــن بـالآلاف والبنـك شغّـال
ياكــــــــــــــــــل فلوسـي بالربـا والظليمـة


والسوق طايـــــــــــــــح والغلا ضيّـق البـال
والــــــــــــــــــموت والله صايـر اكبـر غنيمـة


قالت تحمّـــــــــــــل بـس والحمـل ينشـال
خلك شـــــــــــــديد الباس صلـب العزيمـة


ياخي تصـــــــــــــرّف جعلك اتصيـر نشّـال
أهــــــــــــــــــم شـي إن النوايـا سليـمـة


لابد تفهمـــــــــــــــني علـى كـل الأحـوال
ما دمت من أهل العقـــــــــــــول الفهيمـة


قلت إيه والله فاهـــــــــم اللي على البـال
لكن تـرى هـذي علينـا قديمـــــــــــــــــة


يا بنت هـذا صايـر اليـوم مـــــــــــــــــــوال
للي تبي تلعب علـى ابـن اللئيمـــــــــــة


يا بنت ما تدرين كـم فيـه محــــــــــــــتـال
يلعب على الحبلين وانتـي غشيمــــــــــــة


يا بنت كم من جاهـــــــــــــلة دمعها سـال
من عقب ما جات العواقب وخيــــــــــــــمـة


والبنت لا اقفى عرضـــــــــــــها بيد الأنـذال
والله مـا يبقـى لهـا أي قيـمـــــــــــــــــــــة


قــــــــــــــــالت تبي ولاّ فخلّك علـى جـال
مهوب ناقصنــــــــــــــــــي نصايـح حكيمـة


عز الله إنك للأســـــــــــــــــف منـت رجّـال
وانك قلـــــــــــــيل الذوق ما فيـك شيمـة


يا لعنـــــــــــــــبو اللي مـا يسطّـرك بنعـال
حتـى يعلـــــــــــــــــمـك الغـزل يـا بهيمـة


( تفــــــــــو ) عليك وصكّت الخط في الحال:4:
مــــــــــــدري ( تفو ) هي مدح ولاّ شتيمـة