(((( زمـــــــــــــــان الغـــــــــدر والعـــــــــيب))))



معنى على معنى .. و طرق و تراكيب
همـي و تفكيـري و صوتـي و قافــي

عزله عن العالم .. و حزن .. و مصاليـب
دمع و سكوت و قطع وصـل و تجافـي

ليلة قصيـد .. يِـرّد عنهـا الأصاحيــــــب
و على إنفراد .. اِتبـاح فيهـا الخوافـي

يـا هابـس .. الدنيـا متاهـة سراديــــــب
ماهي على ظنّـك .. سحـاب و فيافــي

شف رجفة كفوفي علـى طـارة الجيـب
تنبيك عـن رجـف الضلـوع الروافــــــي

شايب ولو ما بان فـي راسـي الشيـب
الشيـب فـي جـوف المعاليـق ضافـــي

في كل مره تشـرق الشمـس و تغيـــب
و انا على وضعـي .. جفافـي جفافـي

إن شفت بوجيه العـرب لـي تراحيـــــب
ما شفت بقلـوب العـرب لـي مصافــــي

بعيونهـم كلـي عـيـوب و عـذاريـــــب
و أصدق عذاريبي .. سبـب لاختلافــي

هذا زمـان الكـذب و الغـدر و العيـــــب
مـا هـو زمـان يعيـش فيـه السنافــــي

إن جيت أغنّي يقصر القاف .. و يشيـب
و ان جيت انام الليل .. يقصـر لحافــــي

و ان جيت أسولف للجـروح المعاطيــب
أعطبـت فينـي كـل جـرح متعـافــــي

ضاق الحشا .. و الصمت يحتاج ترتيــب
و انـا علـى صمتـي كتبـت إعترافتــي

الأرض مالت .. و الفضا وضعه مريـــــب
و أربع جهات الكون .. سجن و منافـي

أكتب و لا ادري ويـن أودي المكاتيـب
المـوت قدامـي .. و عمـري خلافـــــــي

يارجـل سجّـي فـوق روس المراقيـــــب
مـن قبـل أسوقـك للبحـر و المرافـــــي

ويـا راس و ان دارت عليـك الدواليــــــب
عن طيحتـك .. تفـداك روس الهرافــــــي

مـا طوعـنّـي زاهـيـات الجلالـيـــــــــــب
و لا أكسـرونـي لابسـيـن القحـافـــــي

إن متّ .. موتي مـن كبـار المكاسيـــــب
و ان عشت ..( ُحرّ ) بوقفتي و أنصرافي